2017 წლის ნოემბერში, იუსტიციის უმაღლესი სკოლის პროექტის - „სამოსამართლო სწავლების გაძლიერება Twinning-ის მეშვეობით“ ფარგლებში, მოქმედი მოსამართლეებისა და სასამართლოს სხვა მოხელეების საჭიროებების, ასევე იუსტიციის უმაღლესი სკოლის გადამზადების არსებული პროგრამის ანალიზის მიზნით, იუსტიციის უმაღლეს სკოლას ესტუმრნენ ექსპერტები კონსორციუმის წევრი სამი სხვადასხვა ინსტიტუციიდან (ლატვიის სამოსამართლო სწავლების ცენტრი; საფრანგეთის მოსამართლეთა ეროვნული სკოლა და ხორვატიის მოსამართლეთა აკადემია): ძინტრა ბალტა, ინეზე ავოტა, კოლინ ლეჟო და ჟელკო პაიალიჩი.
დაგეგმილი აქტივობის ფარგლებში, ექსპერტები შეხვდნენ როგორც მოქმედ მოსამართლეებს, ისე იუსტიციის უმაღლესი სკოლის ტრენერებსა და წარმომადგენლებს.
შეხვედრებზე მიღებული ინფორმაციის საფუძველზე, პროექტის უცხოელი ექსპერტები შეიმუშავებენ შესაბამის ანგარიშსა და რეკომენდაციებს.
პროექტი ხორციელდება კონსორციუმთან თანამშრომლობით, რომელიც შედგება ლატვიის, საფრანგეთისა და ხორვატიის შესაბამისი ინსტიტუტებისგან. პროექტი დაფინანსებულია ევროკავშირის მიერ და მისი ხანგრძლივობაა 18 თვე.
