მიმდინარე წლის 14 და 15 თებერვალს, იუსტიციის უმაღლეს სკოლაში, მოსამართლეებისთვის და სასამართლოს მოხელეებისთვის ტრენინგი თემაზე: „დაზარალებულის უფლებები და კომპენსაციის გადახდის საფუძველი სისხლის სამართლის პროცესის მიხედვით“ გაიმართა.
სემინარს უძღვებოდნენ ქართველი მოსამართლე ტრენერები.
დისკუსიის და პრაქტიკული სავარჯიშოების ფარგლებში მონაწილეებმა განიხილეს შემდეგი საკითხები: სისხლის სამართლის საპროცესო კოდექსში ცვლილებების შეტანის საფუძვლები და კანონის მიზნები; სამოქალაქო კოდექსით განსაზღვრული დელიქტი; დელიქტის ფორმები; დაზარალებულის სტატუსი ადამიანი უფლებათა და თავისუფლებათა ევროპული კონვენციის მიხედვით; სტრასბურგის გადაწყევეტილებები დაზარალებულის უფლებების რეალიზებასთან დაკავშირებით; სამართლიანი სასამართლოს უფლება; კომპენსაციის დაკისრებისთვის საჭირო დელიქტის განსაზღვრა; სარჩელის ფორმა; სარჩელის წარდგენის ეტაპი; მართლმსაჯულების პროცესში კანონის აღსრულების პრაქტიკული ასპექტები; დაზარალებულისათვის კომპენსაციის გადახდის ვალდებულება და სხვა.
ღონისძიებაში მონაწილეობა მიიღეს მოსამართლეებმა და სასამართლოს მოხელეებმა: თბილისის სააპელაციო, თბილისის საქალაქო, გორის, ბოლნისის, გურჯაანისა და თელავის რაიონული სასამართლოებიდან.
ტრენინგი, 2026 წლის მოსამართლეთა და სასამართლოს სხვა მოხელეთა გადამზადების პროგრამით იყო გათვალისწინებული.
